إن جهازك يُصاب بفيروسات ده أمر عادي ووارد جداً، لكن اللي مش عادي هو إنك كل ما تحاول تحمل برنامج أنتي فيروس وتثبته ملف البرنامج نفسه يتصاب بالفيروس وتبقي قدام كارثة فعلية ومابتبقاش عارف تعمل ايه تحديداً. لذلك في الفيديو ده هنتعلم سوا ازاي نعمل فحص أو Scan لجهاز الكمبيوتر من الفيروسات بدون الاضطرار لتثبيت برامج.
بعد استغاثة صديق بسبب الفيروسات وعدم مقدرته علي التعامل معاها، قررت أعمل الفيديو البسيط ده، الشرح هيكون علي Windows 11 لكن لو بتستخدم Windows 10 تقريباً الخطوات هتكون متشابهة بشكل كبير.
كيفية فحص الكمبيوتر بدون برامج مكافحة فيروسات
زي ما احنا متعودين نلجأ لأيقونة البحث في الويندوز، نبحث عن Windows Security، نفتح البرنامج.
من القائمة الجانبية نختار Virus & threat protection، تحت الـ Current Threats نلاقي Scan options نضغط عليها.
يظهر قدامنا اختيارات اننا نعمل Scan أو فحص لجهاز الكمبيوتر، نختار اخر اختيار Microsoft Defender offline scan.
طيب نفهم ليه Microsoft Defender Offline بيعمل Scan وبيحذف الفيروسات من قبل ما السيستم يشتغل، فالإجابة المنطقية إن الويندوز لما بيشتغل طبعا الفيروس بيشتغل معاه وبيكون مرتبط بـ Process مع الويندوز وبالتالي بيفضل شغال وفعال ومحدش قادر عليه.
بعد ما الجهاز يفتح، هيبتدي Microsoft Defender Offline يعمل Scan للكمبيوتر ويفحص الملفات كلها ويعثر على التهديدات سواء فيروسات أو Malware أو حتى Adware ويقوم بحذفها بشكل تلقائي، كل اللي مطلوب منك الانتظار لحد ما عملية الفحص تنتهي، العملية بتستغرق وقت علي حسب حجم البيانات والملفات اللي عندك.
الاطلاع على نتيجة الفحص
بعد ما عملية الفحص وحذف الفيروسات بتنتهي، جهاز الكمبيوتر بيعمل ريستارت ويفتح السيستم مرة تانية، سجل دخول للنظام، ومن خلال البحث هنكتب Windows Security، ومن القائمة الجانبية نختار Virus & threat protection، المرة دي هنضغط على Protection history، في النافذة دي بتظهر نتيجة عملية الفحص وقائمة بالفيروسات اللي البرنامج قدر يتعامل معاها.
